ملک بھر میں یوم عاشور کل منایا جائے گا جس کے لیے سیکیورٹی کے تمام تر انتظامات مکمل کرلیے گئے ہیں۔
ملک بھر میں یوم عاشور کی مناسبت سے سیکیورٹی انتظامات 7 محرم الحرام سے ہی سخت ہیں، کراچی، لاہور، کوئٹہ اور پشاور سمیت مختلف شہروں میں موٹر سائیکل کی ڈبل سواری پر پابندی عائد ہے جب کہ ہنگو میں موٹرسائیکل چلانے پر ہی پابندی لگادی گئی۔
ملک کے مختلف شہروں میں 8 اور 9 محرم الحرام کو موبائل فون سروس معطل رکھی گئی جب کہ یوم عاشور کے روز بھی موبائل فون سروس معطل رہے گی۔
کراچی میں بھی یوم عاشور پر صبح 10 بجے سے موبائل فون سروس معطل رہے گی اور موٹر سائیکل کی ڈبل سواری پر بھی پابندی عائد ہے۔
شہر قائد میں مرکزی جلوس نشتر پارک سے برآمد ہوگا جو اپنے مقررہ راستوں سے ہوتا ہوا امام بارگاہ حسینیہ ایرانیاں کھارادر پر اختتام پذیر ہوگا
مرکزی جلوس کی گزرگاہ کی طرف آنے والے تمام راستوں کو کنٹینر لگا کر بند کردیا گیا ہے جب کہ گزرگاہ میں آنے والی تمام مارکیٹیں بھی سیل ہیں۔
ترجمان وزیر داخلہ سندھ کے مطابق یوم عاشور پر صوبے بھر میں 4 ہزار 281 ماتمی جلوس برآمد ہوں گے اور 14 ہزار 563 مجالس منعقد کی جائیں گے جب کہ تعزیوں کے ایک ہزار 552 جلوس برآمد ہوں گے۔
ترجمان نے بتایا کہ کراچی میں 6 ہزار 485 مجالس، 655 جلوس اور 414 تعزیے نکالے جائیں گے۔
ترجمان وزیر داخلہ سندھ کے مطابق صوبے بھر میں محرم الحرام کے جلوسوں کی سیکیورٹی کے لیے 65 ہزار 129 پولیس اہلکار ڈیوٹی انجام دے رہے ہیں، کراچی میں 9 ہزار 912 اور حیدرآباد میں 12 ہزار 947پولیس افسران واہلکار ڈیوٹی دیں گے۔
اس کے علاوہ 7 ہزار 939 سندھ ریزرو پولیس کے اہلکار بھی سیکیورٹی ڈیوٹی سرانجام دیں گے۔
ایس پی حیدرآباد کے مطابق 10 محرم کو 4 ہزار پولیس اور رینجرز کے 800 جوان ڈیوٹی پر تعینات ہوں گے، جلوس کی مانیٹرنگ کے لیے 50 سے زائد کیمرے نصب کیے گئے ہیں جب کہ مرکزی جلوس کے ہمراہ بم ڈسپوزل اسکواڈ کا عملہ بھی تعینات ہوگا۔
لاڑکانہ میں یوم عاشور کے جلوسوں کی سیکیورٹی کے لیے شہر میں 3 ہزار پولیس اور رینجرز اہلکار تعینات کیے گئے ہیں۔
یوم عاشور پر پنجاب حکومت نے جلوس کے روٹ پر فوج اور رینجرز سے مدد طلب کی ہے جب کہ ٹریفک پولیس نے بھی نویں اور دسویں محرم الحرام کے لیے ٹریفک پلان جاری کر دیا ہے۔
پنجاب حکومت نے مرکزی جلوس کے اطراف موبائل فون سروس معطل رکھنے کا فیصلہ کیا ہے جس کے تحت موچی گیٹ سے کربلا گامے شاہ تک موبائل سروس معطل رہے گی۔
لاہور میں ٹھوکر نیاز بیگ اور ماڈل ٹاؤن کے اطراف بھی موبائل فون سروس معطل ہوگی۔
پنجاب حکومت نے لاہور میں مرکزی جلوس کی سیکیورٹی کے لیے فضائی نگرانی کا بھی فیصلہ کیا ہے۔
ذرائع کے مطابق راولپنڈی میں بھی مرکزی جلوس کے راستوں پر موبائل فون سروس معطل رکھنے کا فیصلہ کیا گیا ہے۔
سی سی پی او پشاور نے شہر میں 10 محرم کے تمام ماتمی جلوسوں کو حساس قرار دیا ہے۔
سی سی پی او کے مطابق پشاور میں تقریباً 120 ماتمی جلوس اور 300 سے زیادہ مجالس ہیں اور محرم الحرام میں دہشتگردی کا خطرہ موجود ہے۔
سی سی پی او پشاور کا کہنا تھا کہ شہر میں مجموعی طور پر 10 ہزار سے زیادہ اہلکار تعینات ہیں، مختلف مقامات پر اضافی ناکہ بندیاں کی گئی ہیں، شہر میں مجموعی طور پر 225 سی سی ٹی وی کیمرے نصب ہیں جب کہ سیکیورٹی کے لیے پاک فوج، ایف سی اور دیگر اداروں کی مدد حاصل ہے۔
سی سی پی او کے مطابق فاٹا کے ساتھ سرحد پر پولیس تعینات کی جائے گی۔
ڈی آئی جی کوئٹہ عبدالرزاق چیمہ کے مطابق شہر میں یوم عاشور پر پولیس کے 6 ہزار اہلکار ڈیوٹی انجام دیں گے اور حساس مقامات پر پولیس کے علاوہ ایف سی اہلکار بھی تعینات ہوں گے۔
ڈی آئی جی کوئٹہ کے مطابق شہر کے مختلف علاقوں میں 50 سی سی ٹی وی کیمرےنصب کیےگئے ہیں جب کہ محرم کےجلوسوں کی فضائی نگرانی بھی کی جائے گی۔
ملتان پولیس نے ضلع بھر میں 172 مجالس میں سے 39 مجالس اور 75 جلوسوں میں سے 13 کو انتہائی حساس قرار دیا ہے۔
ملتان میں جلوسوں کی سیکیورٹی کے لیے 2300 سے زائد پولیس اہلکار و افسران ڈیوٹی پر مامور ہیں۔
ترجمان سول ڈیفنس کے مطابق ملتان میں پاک گیٹ،حرم گیٹ،خونی برج، شاہ رسال اور دیگر جلوسوں کےروٹس کی نگرانی کی جائے گی، یوم عاشور تک 130 کیمروں کی مدد سے جلوسوں اور مجالس کی نگرانی کی جائے گی جب کہ مانیٹرنگ سیل میں عملہ یوم عاشور تک 24 گھنٹے نگرانی میں مصروف رہےگا۔
قالب وردپرس
