جنوبی افریقہ سے ون ڈے سیریز کیلئے بنگلہ دیشی اسکواڈ کا اعلان

بنگلہ دیشی کرکٹ بورڈ کی سلیکشن کمیٹی نے جنوبی افریقہ کے خلاف شیڈول ون ڈے انٹرنیشنل کرکٹ سیریز کیلئے اسکواڈ کا اعلان کر دیا اور 20 سالہ آل راؤنڈر محمد سیف الدین پہلی بار سلیکٹرز کا اعتماد حاصل کرنے میں کامیاب رہے۔

بنگلہ دیش اور جنوبی افریقہ کے درمیان تین ون ڈے میچوں کی سیریز کا آغاز 15 اکتوبر سے ہو گا جس سے مصدق حسین اور سنزامل اسلام کو انجری مسائل کے باعث ڈراپ کر دیا گیا ہے۔

2016ء میں منعقدہ انڈر 19 ورلڈ کپ میں متاثر کن کارکردگی کا مظاہرہ کرنے والے سیف الدین کو بھی ٹیم کا حصہ بنایا گیا ہے، انہوں نے رواں برس اپریل میں ٹی ٹونٹی ڈیبیو کیا تھا۔

آل راؤنڈر ناصر حسین کی بھی دوبارہ ٹیم میں واپسی ہوئی ہے جبکہ لٹن داس کو بھی قریباً دو برس دوری کے بعد دوبارہ ٹیم میں طلب کیا گیا ہے، انہوں نے آخری بار نومبر 2015ء میں ون ڈے میچ میں ملک کی نمائندگی کی تھی۔

اعلان کردہ ٹیم کی قیادت مشرفی مرتضیٰ کریں گے جبکہ دیگر کھلاڑیوں میں تمیم اقبال، لٹن داس، سومیا سرکار، امرالقیس، محموداللہ، مشفق الرحیم، شکیب الحسن، صابررحمان، ناصرحسین، مہدی حسن میراز، مستفیض الرحمان، تسکین احمد، روبیل حسین اور محمد سیف الدین شامل ہیں۔

قالب وردپرس