کون بنے گا کروڑ پتی کے دسویں سیزن کا ٹیزرجاری

https://is.gd/PdFFF3

حالات کو کوسو گے یا حالات سے پوچھو گے کہ کب تک روکو گے، امیتابھ بچن ۔فوٹو: فائل

ممبئی: میگا اسٹار امیتابھ بچن کے مشہور رئیلٹی شو’ کون بنے کا کروڑ پتی‘ کے دسویں سیزن ٹیزر جاری کردیا گیا۔

بھارت کے مشہور رئیلٹی شو ’’ کون بنے گا کروڑ پتی‘‘ بھارت سمیت دنیا بھر میں مشہور ہے جس میں مشہور اداکاروں کے علاوہ عام افراد بھی شرکت کرکے اپنی قسمت آزمائی کرتے ہیں اور ساتھ ہی امیتابھ  بچن بطور میزبان اپنی دلچسپ باتوں سے گھروں میں موجود شائقین کو بھی محظوظ کرتے ہیں۔

بھارتی میڈیا رپورٹس کے مطابق بالی ووڈ کے شہنشاہ امیتابھ بچن اپنے مقبول ترین رئیلٹی شو ’’کون بنے گا کروڑ پتی‘‘ کے دسویں سیزن کے ساتھ ایک بار پھر مداحوں کو محظوظ کرنے آرہے ہیں جس کا ٹیزر جاری کردیا گیا ہے۔

ٹیزر میں ایک عام بھارتی شہری کی  کہانی کو دکھایا گیا ہے، لکھن یادیو نامی شخص اپنے بیٹے کو بہترین تعلیم فراہم کرنے کے غرض سے چھوٹے سے گھر میں منتقل ہو جاتا ہے اور بچے کی پڑھائی کے لیے دن رات محنت کرتا ہے مگر وقت گزرنے کے ساتھ تعلیمی اخراجات میں اضافہ ہوجاتا ہے جس کو پورا کرنے کے لئے یادیو دو نوکریاں کرتا ہے۔

اگلے مرحلے میں بچے کو انجنیئر بننے کی خواہش ظاہر کرتے ہوئے دکھایا گیا ہےجس کے لیے اسے داخلہ تو مل جاتا ہے مگر اعلیٰ تعلیم کی فیس کی ادائیگی کو پورا کرنے کا سوچتے ہی یادیو کو امیتابھ بچن کے ساتھ ہاٹ سیٹ پر ساتھ بیٹھا دکھایا گیا ہے جہاں امیتابھ ایک سوال کے جواب میں یادیو کی تعریف کرتے ہوئے کہتے ہیں کہ حالات کو کوسو گے یا حالات سے پوچھو گے کہ کب تک روکو گے۔

واضح رہے کہ میگا اسٹار امیتابھ بچن مسلسل شو کے 4 سیزن کی میزبانی کرچکے ہیں جب کہ بالی ووڈ کنگ شاہ رخ خان بھی اس شو کی میزبانی کے فرائض انجام دے چکے ہیں۔
Urdu Khabrain