کراچی مرکزی جلوس میں سیاسی رہنماؤں اور ڈپٹی میئر کراچی کی شرکت

کراچی میں نو محرم الحرام کےمرکزی جلوس اور نمائش پر واقع کیمپ میں سیاسی رہنماوں اور ڈپٹی میئر کراچی ارشد وہرہ کی شرکت،، کیمپ کے باہر شربت اور لنگر تقسیم کیا ۔

کراچی میں نو محرم الحرام کے مرکزی جلوس اور نمائش پر واقع کیمپ میں سیاسی رہنماوں سمیت ڈپٹی میئر کرا چی ارشد وہرہ نے شرکت کی۔

انہوں نے مختلف تنظیموں کی جانب سے لگائے گئے کیمپوں کا دورہ کیا،ارشد وہرہ کے ساتھ پیپلز پارٹی کے رہنما بھی نمائش پہنچے رہنماوں میں ڈپٹی اسپیکر سندھ اسمبلی شہلا رضا، وقار مہدی، راشد ربانی شامل تھے،ڈپٹی میئر کراچی کا اس موقع پر کہنا تھا کہ کہا حق کے لیے قربانی دینے والے ہمیشہ کے لیے زندہ رہ جاتے ہیں، شہدائے کربلا نے حسینی فکر اور شجاعت پیدا کی۔

انہوں نے کہا امن و امان قائم کرنے والے اداروں اور دیگر متعلقہ اداروں نے عمدہ انتظامات کئے ہیں،، جبکہ ڈٰی ایم سی ایسٹ کے کیمپ پر موجود پی پیپلز پارٹی کے رہنماوں نےعزاداروں میں شربت اور لنگر تقسیم کیا۔

قالب وردپرس

بنگلا دیش ہجرت کرنیوالے روہنگیا مسلمانوں کی کشتی ڈوب گئی، 60 ہلاک

میانمار سے بنگلا دیش پہنچنے کی کوشش کرنے والے روہنگیا مسلمانوں کی کشتی ڈوبنے سے کم ازکم 60 افراد ہلاک ہوگئے۔

میانمار میں ریاستی تشدد کے بعد 5 لاکھ سے زائد روہنگیا مسلمان بنگلادیش کی سرحد کے قریب پناہ گزین کیمپوں میں رہائش پذیر ہیں۔

میانمار حکومت کی پشت پناہی میں بدھ ملیشیا کے مظالم سے جان بچا ہجرت کرنے والے روہنگیائی مسلمانوں کی کشتی خلیج بنگال میں اندامان سمندر میں بنگلہ دیش پہنچنے سے پہلے ہی ڈوب گئی جس میں کم از کم 60 افراد ڈوب کر ہلاک ہوگئے۔

زندہ بچ جانے والے کشتی مسافروں کے مطابق غیرقانونی طریقے سے سفر کرنے والی اس کشتی کا کپتان چیک پوائنٹس سے بچنے کی پوری کوشش کرتا رہا لیکن تیز بارشوں کے سبب سمندر میں طغیانی کے باعث کشتی الٹ گئی۔

اقوام متحدہ کے ادارہ برائے مہاجرین کے اعداد و شمار کے مطابق میانمار سے بنگلا دیش ہجرت کرنے والے روہنگیا مسلمانوں کی تعداد اب تک 5 لاکھ سے تجاوز کر چکی ہے۔

اقوام متحدہ کے سیکریٹری جنرل نے خبردار کیا ہے کہ بنگلا دیش میں روہنگیا مہاجرین کی بڑھتی ہوئی تعداد ناکافی وسائل کے سبب وہاں تشویشناک صورتحال پیدا کرسکتی ہے۔

قالب وردپرس

بسمہ معروف وویمن ون ڈے ٹیم کی کپتان مقرر

ثنا میر کی جگہ بسمہ معروف کو ویمن ون ڈے ٹیم کی بھی کپتان مقرر کردیا گیا ہے۔ ثنا میر قیادت سے سبکدوش ہوگئیں تاہم سلیکشن کے لئے دستیاب ہوں گی۔

بسمہ معروف ٹی ٹوئنٹی کی پہلے ہی کپتان ہیں اب وہ ون ڈے ٹیم کی بھی قیادت کریں گی۔ چیف سلیکٹر محمد الیاس سمیت ویمنز سلیکشن کمیٹی کو بھی برطرف کردیا گیا ہے۔

ویمنز ٹیم کی جنرل منیجر شمسہ ہاشمی اور مینیجر عائشہ اشعر بھی فارغ کردی گئی ہیں۔ نئی جی ایم کی تقرری تک عائشہ اشعر فرائض انجام دیں گی۔

یاد رہے کہ قومی ویمنز کرکٹ ٹیم کی ورلڈکپ میں ناقص کارکردگی کے بعد پی سی بی کی تحقیقات جاری تھیں۔ کوچ، کپتان، چیف سلیکٹر اور منیجر کی رپورٹس اور جی ایم ویمنز ونگ کے انٹرویو کے بعد وسیع پیمانے پر اکھاڑ پچھاڑ کا فیصلہ کیا ہے۔

واضح رہے کہ ثنا میر کی جانب سے ساتھی کھلاڑیوں کو لکھے گئے مبینہ خط میں کہا گیا تھا کہ موجودہ ویمن ٹیم مینجمنٹ کھلاڑیوں کی عزت نہیں کرتی اور میرٹ پر سمجھوتہ کررہی ہے، اسی بنا پر میں موجودہ عہدے داروں کے ساتھ کام نہیں کرسکتی۔

قالب وردپرس

آئندہ ماہ کیلئے پیٹرولیم مصنوعات کی قیمتوں میں اضافے کی سفارش

اوگرا نے آئندہ ماہ کے لیے پیٹرولیم مصنوعات کی قیمتوں میں اضافے کی سفارش کردی۔

ذرائع کے مطابق اوگرا کی جانب سے وزارت پیٹرولیم کو بھیجی گئی سمری میں پیٹرول کی قیمت میں 2 روپے 36 پیسے اورڈیزل کی قیمت میں 2 روپے 20 پیسے اضافے کی سفارش کی گئی ہے۔

جب کہ لائٹ ڈیزل کی قیمت میں 14 روپے 10 پیسے اور مٹی کے تیل کی قیمت میں 19 روپے 33 پیسے فی لیٹر اضافے کی سفارش کی گئی ہے۔

اوگرا کی جانب سے بھیجی گئی سمری وزارت پیٹرولیم، وزارت خزانہ کو بھیجے گی اور وزیراعظم قیمتوں کے تعین کا حتمی فیصلہ کریں گے۔

قالب وردپرس

اپوزیشن لیڈرکی تبدیلی کا کسی کو شوق ہے تو پورا کرلے، قمر زمان کائرہ

پیپلزپارٹی کے رہنما قمر زمان کائرہ کا کہنا ہے کہ اپوزیشن لیڈرکی تبدیلی کے لیے جمہوری طریقہ اپنایا جاتا ہے اور اگر کسی کو اپوزیشن لیڈر تبدیل کرنے کا شوق ہے تو پورا کرلے۔

پیپلزپارٹی کے شریک چیرمین آصف زرداری کے زیر صدارت اہم اجلاس کے بعد میڈیا سے بات کرتے ہوئے پیپلزپارٹی وسطی پنجاب کے صدر قمر زمان کائرہ کا کہنا تھا کہ اپوزیشن لیڈرکی تبدیلی کے لیے جمہوری طریقہ اپنایا جاتا ہے اور اگر جو اپوزیشن لیڈرتبدیل کرنا چاہتے ہیں وہ نمبرگیم پوری کریں کیوں کہ یہ تبدیلی قومی اسمبلی میں نمبر پورے ہونے پرہی ہوگی اورنمبرکسی کی خواہش پر پورے نہیں ہوں گے۔

قمر زمان کائرہ کا کہنا تھا کہ جو طریقہ آئین میں درج ہے اسی پر چلتے ہوئے چیرمین نیب اور عبوری حکومت کا تقرر ہونا ہے جب کہ تحریک انصاف ایک صوبے میں حکومت کررہی ہے اور ایک میں اپوزیشن میں لہذا دونوں صوبوں میں ان کی مشاورت سے ہی عبوری حکومت آئے گی۔

انہوں نے کہا کہ ہمارے بارے میں بار بار مک مکا کا کہا جارہا ہے، پیپلزپارٹی کسی مک مکا کاحصہ تھی اورنہ ہی ہے جب کہ میڈیا کی طرف سےمک مکا کےالفاظ استعمال ہونے پرافسوس ہے، اپوزیشن لیڈر کے انتخاب پر اپنی حکمت عملی شیئر نہیں کرسکتے، ہمارے ساتھی اور دوست ہمارے ساتھ ہیں اور جہاں جہاں مشاورت کی ضرورت ہوگی وہ ہم ضرور کریں گے۔

واضح رہے تحریک انصاف اور ایم کیو ایم نے قومی اسمبلی میں قائد حزب اختلاف کی تبدیلی پر اتفاق رائے کا اظہار کیا ہے اور اس سلسلے میں دیگر اپوزیشن جماعتوں کو بھی اعتماد میں لیا جارہا ہے۔

قالب وردپرس

ممبئی کے ریلوے اسٹیشن پر بھگدڑ سے 22 افراد ہلاک، 30 زخمی

بھارتی شہر کے ریلوے اسٹیشن پر بھگدڑ مچنے سے 22 افراد ہلاک اور 30 زخمی ہوگئے۔

بھارتی میڈیا کے مطابق ممبئی میں ایلفنسٹن ریلوے اسٹیشن پر بھگدڑ مچنے سے کم از کم 22 افراد ہلاک اور 30 زخمی ہوگئے۔ لاشوں اور زخمیوں کو طبی امداد فراہم کرنے کے لیے اسپتال منتقل کردیا گیا ہے۔ بعض افراد شدید زخمی ہیں جس کی وجہ سے ہلاکتوں میں اضافے کا اندیشہ ہے۔

حکام کے مطابق کام کے اوقات میں ایلفنسٹن ریلوے اسٹیشن پر دفتر جانے والے لوگوں کا شدید رش ہوتا ہے اور بھگدڑ مچنے کا واقعہ پیدل چلنے والوں کے پل پر پیش آیا جو دو اسٹیشنوں کو ملاتا ہے۔

پولیس نے بتایا کہ 4 ٹرینیں ایک ساتھ آئیں جب کہ بارش بھی ہورہی تھی۔ بہت سارے لوگ ٹرینوں میں بیٹھنے کے لیے دوڑے جس کی وجہ سے بعض خواتین پھسل گئیں اور بھگدڑ مچ گئی جبکہ متعدد لوگ پیروں کے نیچے آکر کچلے گئے۔

اس دوران ریلوے اسٹیشن اور پل پر اتنا ہجوم جمع ہوگیا کہ بعض افراد نے پل سے چھلانگیں لگادیں جس کے نتیجے میں کئی افراد کی ٹانگیں بھی ٹوٹ گئیں اور شدید چوٹیں آئیں۔

سوشل میڈیا پر بھارتی شہریوں نے واقعے پر شدید غم و غصے کا مظاہرہ کرتے ہوئے عوام کو بنیادی سہولیات کی فراہمی میں ناکامی پر مودی حکومت کو کڑی تنقید کا نشانہ بناتے ہوئے کہا کہ ہمارے ٹیکسز کا یہ اچھا صلہ مل رہا ہے۔

بھارتی میڈیا نے بتایا کہ پیدل چلنے والوں کا پل بھی انتہائی خستہ حال اور گنجائش سے چھوٹا ہے جسے ٹھیک کرانے کے لیے بارہا مطالبات کیے گئے لیکن حکومت کے کانوں پر جوں نہیں رینگی۔

قالب وردپرس

پہلے ٹیسٹ کے دوسرے روز سری لنکا کی پاکستان کے خلاف بیٹنگ

سری لنکا کی پہلے ٹیسٹ کے دوسرے روز پاکستان کے خلاف بیٹنگ جاری ہے۔

ابوظہبی کے شیخ زید اسٹیڈیم میں کھیلے جانے والے میچ کے دوسرے روز مہمان ٹیم نے اپنی نامکمل اننگز 227 رنز 4 کھلاڑی آؤٹ سے دوبارہ شروع کی۔

پہلے روز کھیل کے اختتام تک کپتان دنیش چندیمل 60 اور ڈکویلا 42 رنز کے ساتھ کریز پر موجود تھے اور وہیں سے دوبارہ بلے بازوں نے دوبارہ اننگز کا آغاز کیا۔

قومی ٹیم کے بولنگ کوچ اظہر محمود کا جیو نیوز سے گفتگو کرتے ہوئے کہنا تھا کہ بولرز نئی گیند سے فائدہ نہیں اٹھاسکے تاہم دوسرے روز کھیل کے دوران سری لنکا کو جلد آؤٹ کرنے کی کوشش کریں گے۔

سری لنکن ٹیم کے کپتان دنیش چندیمل نے ٹاس جیت کر پہلے بیٹنگ کا فیصلہ کیا تو پہلے سیشن میں مہمان ٹیم دباؤ کا شکار رہی اور تین کھلاڑی پویلین لوٹ گئے۔

اوپننگ بلے باز کشال سلوا اور کرارتنے نے 34 رنز کی شراکت قائم کی تو سلوا 12 رنز بنانے کے بعد حسن علی کی گیند پر بولڈ ہوگئے جس کے بعد ایک رنز کے اضافے کے بعد نئے آنے والے بلے باز لہرو تھرمانے بھی بغیر کوئی رنز بنائے یاسر شاہ کی گیند پر ایل بی ڈبلیو آؤٹ ہوئے۔

تیسرے آؤٹ ہونے والے بلے باز مینڈس تھے جو صرف 10 رنز بناسکے جنہیں یاسر شاہ نے اپنی گھومتی ہوئی گیند سے شکار بنایا۔

چوتھی وکٹ پر اوپننگ بلے باز کرارتنے اور کپتان دنیش چندیمل نے محتاط انداز اپناتے ہوئے اسکور آگے بڑھایا اور چائے کے وقفے تک دونوں بلے بازوں نے 82 رنز کی شراکت قائم کرتے ہوئے ٹیم کا مجموعی اسکور 143 تک پہنچا دیا۔

سری لنکا کی چوتھی وکٹ 161 رنز پر گری اور کرارتنے 93 رنز پر رن آؤٹ ہوئے۔

بعدازاں چندی مل اور ڈک ویلا نے دن کے اختتام تک اننگز کو سنبھالا اور سری لنکن ٹیم کو مزید کسی نقصان سے دور رکھا۔

پاکستان کی جانب سے یاسر شاہ نے دو جبکہ حسن علی نے ایک کھلاڑی آؤٹ کیا۔

یاسر شاہ کا اعزاز

سری لنکا کے خلاف میچ میں یاسر شاہ نے دو وکٹیں حاصل کر کے ٹیسٹ کی تاریخ میں سب سے تیز ترین 150 وکٹیں حاصل کرنے والے اسپنر بن گئے ہیں۔

یاسر شاہ نے مجموعی طور پر اپنے 27 ویں ٹیسٹ میچ میں یہ کارنامہ انجام دیا جب کہ ان سے قبل آسٹریلیا کے کلیری گریمیٹ نے 28 میچوں میں 150 وکٹیں حاصل کی تھیں۔

پاکستان کی جانب سے حارث سہیل اپنا ڈیبیو میچ کھیل رہے ہیں جب کہ قومی ٹیم کپتان سرفراز احمد، شان مسعود، سمیع اسلم، اظہرعلی، اسد شفیق، بابراعظم، محمد عامر، یاسر شاہ، محمد عباس اور حسن علی پر مشتمل ہے۔

سری لنکن ٹیم کشال سلوا، ڈیموتھ کرارتنے، کشال مینڈس، کپتان دنیش چندیمل، لہیرو تھرمانے، نروشان ڈکویلا، دلرووان پریرا، رنگانا ہیراتھ، سرنگا لکمل، لکشان سنداکان اور نوان پرادیپ پر مشتمل ہے۔

ٹاس ہارنے کے بعد سرفراز احمد کا کہنا تھا کہ اگر ٹاس جیت جاتے تو پہلے بیٹنگ ہی کرتے، کھلاڑیوں نے بہت محنت کی ہے اور میچ میں اچھا پرفارم کریں گے۔

کپتان سرفراز احمد نے کہا کہ تینوں فارمیٹ میں قیادت کرنا اعزاز کی بات ہے اور سری لنکا کے خلاف سیریز کے لئے کافی پرجوش ہوں۔

 آئی سی سی کے نئے قوانین کا اطلاق

پاکستان اور سری لنکا کے درمیان کھیلے جانے والے سیریز کے پہلے ٹیسٹ میچ سے کرکٹ کی دنیا میں آئی سی سی کے نئے قوانین کا اطلاق ہونے جارہا ہے۔

نئے قوانین کے مطابق امپائرز کو آن فیلڈ کوڈ آف کنڈکٹ کی خلاف ورزی کرنے والے کھلاڑی کو میدان سے باہر بھیجنے اور حریف ٹیم کو پینلٹی رنز دینے کا اختیار مل گیا ہے۔

نئی ترامیم کے تحت پلیئرز کے آن فیلڈ کنڈکٹ کو 4 حصوں میں تقسیم کیا گیا ہے جس کے تحت میچ کے دوران نظم و ضبط کی خلاف ورزی کرنے والے کھلاڑی کو محدود مدت سے لے کر مکمل اننگز کے لئے میدان سے باہر کرنا اور حریف ٹیم کو 5 پینلٹی رنز دینا فوری سزا میں شامل ہے۔

اگر کپتان کھلاڑی کو گراؤںڈ سے باہر بھیجنے سے انکار کرتا ہے تو امپائر کو حق حاصل ہوگا کہ وہ حریف ٹیم کو فاتح قرار دیدے۔

قالب وردپرس