پاکستان کرکٹ بورڈ (پی سی بی) نے قومی ٹیم کے ہیڈ کوچ مکی آرتھر کے معاہدے کی توسیع کرتے ہوئے انہیں کرکٹ ورلڈ کپ 2019 تک ٹیم کا کوچ مقرر کردیا گیا۔
جنوبی افریقہ سے تعلق رکھنے والے مکی آرتھر کو گذشتہ برس مئی میں دو سال کی مدت کے لیے پاکستان ٹیم کا ہیڈ کوچ مقرر کیا گیا تھا اور ان کی مدتِ ملازمت آئندہ برس اپریل میں ختم ہونا تھی جو اب بڑھ کر ورلڈ کپ 2019 تک ہوگئی ہے۔
انگلینڈ میں ہونے والی چیمپیئنز ٹرافی 2017 میں پاکستان کی شاندار کامیابی کے پیش نظر ان کے معاہدے میں توسیع کی گئی ہے۔
مکی آرتھر نے پی سی بی سے خواہش کا اظہار کرتے ہوئے کہا ہے کہ ان کے ہمراہ کام کرنے والے دیگر کوچنگ اسٹاف کے معاہدے بھی بڑھا دیے جائیں تاکہ اسی امتزاج کے ساتھ ورلڈ کپ 2019 کی تیاری کی جاسکے۔
خیال رہے کہ گرانٹ فلاور مکی آرتھر سے پہلے پاکستان کرکٹ ٹیم کے بیٹنگ کنسلٹنٹ مقرر تھے تاہم اسٹیو رکسن اور باؤلنگ کوچ اظہر محمود کو مکی آرتھر کی ہی تجویز پر ذمہ داریاں سونپی گئیں تھی۔
پی سی بی نے مکی آرتھر کے معاہدے کی تصدیق کرتے ہوئے بتایا کہ چیمپینز ٹرافی جیتنے کے بعد مکی آرتھر ورلڈکپ 2019 کے لیے بھی بہترین کوچ ثابت ہوسکتے ہیں۔
واضح رہے کہ کرکٹ کا بارہواں عالمی میلا 2019 میں مئی سے جولائی تک انگلینڈ اور ویلز میں کھیلا جائے گا جس میں کرکٹ کی صف اول کی 10 ٹیمیں شرکت کریں گی۔
No comments:
Post a Comment