سبزیاں اور پھل جسم کی شریانوں کو فعال رکھنے میں معاون

https://is.gd/JQ1lPd
سبزیاں اور پھل کھانے کے یوں تو بے شمار فوائد ہیں لیکن حال ہی میں ماہرین نے آگاہ کیا ہے کہ پھل اور سبزیاں جسم کی مختلف شریانوں کو صحت مند رکھ کر مختلف امراض سے بچا سکتی ہیں۔

امریکا کی نیویارک یونیورسٹی اسکول آف میڈیسن میں کی جانے والی اس تحقیق کے لیے 35 لاکھ سے زائد امریکیوں کا طبی معائنہ اور تجزیہ کیا گیا۔

تحقیقی سروے کے نتائج سے معلوم ہوا کہ جن افراد نے اپنی روزمرہ کی خوراک میں باقاعدگی سے پھل اور سبزیوں کو شامل کیا وہ شریانوں کے تنگ ہوجانے کے مرض پیری فیرل آرٹری ڈیزیز سے محفوظ رہے۔



اس مرض میں دل سے ٹانگوں کی طرف جانے والی شریانیں تنگ ہوجاتی ہیں جس سے ٹانگوں کی طرف خون کے بہاؤ میں کمی آجاتی ہے اور ٹانگوں میں کھنچاؤ اور تکلیف کا سامنا ہوتا ہے۔ علاوہ ازیں ٹانگوں کے اعصاب بھی تھکن کا شکار ہوجاتے ہیں۔

اس سے قبل کئی تحقیقوں میں بتایا جاچکا تھا کہ سبزیاں اور پھل دل کے دورے اور فالج کا خطرہ کم کرتی ہیں، تاہم شریانوں پر ان کا یہ مثبت اثر پہلی بار سامنے آیا ہے۔

مذکورہ تحقیق میں یہ بھی دیکھا گیا کہ بزرگ خواتین و حضرات پھل اور سبزیوں کے باقاعدہ استعمال کے عادی تھے لہٰذا ان میں شریانوں کے تنگ ہوجانے کے مرض کی شرح بھی کم تھی۔

اس کے برعکس نوجوانوں نے اپنی غذا میں پھل سبزیاں کم استعمال کیں جس کی وجہ سے ان میں اس مرض کا شکار ہونے کا خطرہ بھی زیادہ دیکھا گیا۔

تحقیق میں شامل ماہرین کے مطابق، ’اگر ہم اپنی نئی نسل کو آگاہی دیں کہ سبزیوں اور پھلوں کا باقاعدہ استعمال کس قدر فائدہ مند ہے، تو ہم بہت سی بیماریوں کو پیدا ہونے سے پہلے ہی ختم کرسکتے ہیں‘۔



ماہرین کا کہنا ہے کہ شریانوں کے تنگ ہوجانے کا مرض ان افراد کو خاص طور پر اپنا نشانہ بناتا ہے جو تمباکو نوشی کے عادی ہوتے ہیں۔

ان کے مطابق سگریٹ کے عادی افراد کو اپنی خوارک میں زیادہ سے زیادہ پھل اور سبزیوں کا استعمال کرنا چاہیئے تاکہ وہ سگریٹ کے تباہ کن اثرات سے کسی حد تک محفوظ رہ سکیں۔
Urdu Khabrain
Health Khabrain, Health News, Health Urdu News, Pakistan Health News, Pakistani News, Top Health News, Urdu Khabrain, Urdu News, Viral Health News, اور, جسم, رکھنے, سبزیاں, شریانوں, صحت, فعال, معاون, میں, پھل, کو, کی